Grüezi Mitenand. Au ich möchte Sie herzlich begrüesse, zu dem doch sehr bsundere Alass.
Ich danke de Odd Fellows für die Iladig hüt do a dem Loge-Ritual dörfe debi z’i. D’Afrog, öb ich mir zu dem Alass es paar Gedanke wür mache, öb die Wert, wo sich Odd Fellows uf Fahne gschriebe hend, hüt no aktuell sind, ehrt mich. Die Afrog isch für mich e Motivation gsi, mich überhaupt emol mit dem Thema Ritual usenandsetze und mir Gedanke z’mache über Loge, Orde, Bruderschafte und de Suechi noch em Sinn.Als eidgenössisch diplomierte Coiffeurmeiser bin ich do jo in bester Gsellschaft. En Obermeister, en Untermeister, en Altmeister und en Schatzmeister.
Es git jo nochher den no en Apero, ich hoffe also das üs de Chellermeister auno voregstellt wird.Es handlet sich hüt aber nöd um d’Odd Fellows Meisterschafte sondern um 150 jöhrigi Traditione, Philosophie und s’erhalte vo Wert.Wert sind jo öpis wo mir als positiv, erstrebenswert oder als moralisch wichtig empfinded.Wert sind, wie’s vo de Odd Fellows glebt werded, tüf verwurzleti Überzügige, Wert sind e Lebesistellig, es sind Ideal und Bedürfnis.Die Wert wo Mitglieder i sonnere Gmeinschaft teilet, träged zur Identität und zur Kultur bi.Es git jo verschiedni Gründ, wieso Wert wie Achtsamkeit, Fründschaft, Liebi und Wohrheit i üsere Gsellschaft immer meh verschwinded.
Was git’s do für möglichi Ursache.I üsere wohlstands Gsellschaft stöhnd persönlichi Interess und Bedürfnis immer meh im Vordergrund, was dezu führt, dass zwüschemenschlichi Beziehige und Wert wie Fründschaft und Liebi vernochlässiget werded.
Die fortschritlich Digitalisierig und Technologisierig wo üsen Altag immer meh beherscht führt dezu, das mir immer weniger Zyt hend für achtsami Begegnige mit üsne Mitmensche.Statt mit Fründe und Fründinne öpis z’underne verlüred sich vieli lieber i irgendwelche virtuelle Welte. Muesch nüd abmache, muesch nöd zum Hus us, muesch dich nöd a Abmachige halte. I de hütige Konsumgsellschaft werded die materielle Wert oft höcher igschätzt als immatrielli Wert wie ebe Achtsamkeit oder Zueverlässigkeit. Sogenannti Fake News, Informatione us de Soziale Medi wie Tiktok, Facebook und wie si alli heissed wo völlig a de Realität verbi informiered und underdesse, dank künstlicher Inteligenz individuel und gezielt uf s’Konsumverhalte vo einzelne zuegschnitte isch.
Frog isch jo gsi öb die Wert no aktuell sind.
Meh cha sich aktuell zum Bispiel bim Sergio Ermotti fröge, welli Wert ihm no wichtig sind. Oder de Donald Trump, wo offesichtlich gar kei Wertvorstellige meh het.
Wichtigi Persönlichkeite, weltwit, wo eigentlich als Vorbilder söted do stoh und Wert vermittle, missbruched ihres Amt zum eigne Vorteil. Für was sölled den mir Normalbürger üs no um irgend welchi Wert kümmere.Wenn mir gsehnd, das me mit Korruption, Egoismus und Rücksichtslosigkeit ringer as Ziel chunt, als weme Rücksichtsvoll, achtsam und ehrlich wöt sin Weg go.
Es isch die gsellschaftlich Wertvorstellig wo sich im Lauf vo de Zyt veränderet het und bestimmti Wert wie Achtsamkeit und Worheit a Bedütig immer meh verlüred, währed ebe anderi Wert in Vordergrund rucked. Mängmol het meh scho‘s Gfühl mir lebed innere Welt voller Egoischte, Narzischte, Populischte und was es suscht no alles a Spezie i dere Art git.
Frog öb die Wert, es so wie sie vo de Odd Fellows glebt werded no aktuell sind, müesst me under dene Umständ eigentlich mit NEI beantworte, sie sind am Verschinde, sind nüme Massetauglich, sind abglösst worde, sind nüme gfroget. Aber ich denke s’Bedürfniss noch sotige Wert isch trotzdem immer no vorhande und werded durch Ritual, wie mir‘ jetzt grad erlebed, verinnerlicht.Ich zum Bispiel stoh am Morge uf, gang an Briefchaste go Zytigi hohle und nochher lesed mini Partneri und ich währed em Kafitrinke Zitig. Ich froge Sie mini Dame und Herre isch etz das eifach Altag, oder chönt meh dem au Ritual säge?
Mir alli hend doch üsri tägliche Abläuf. Es git sötig die gönd jede Tag zur gliche Zyt usem Hus, stönd jede Tag zur gliche Zyt am Bahnhof ufem Perron und z‘wor sogar immer am gliche Paltz, wills wüssed de Wage vo de zweite Klass halted genau do. Wehe wenn de Zug emol Verspötig het, den wird de rituelli Altag scho am Morge durchbroche.
Für die einte isch es underdesse zum Ritual worde, jedi Ostere am Gotthard im Stau z‘stoh.
Oder wie isch es zum Bispiel a de Wyhnacht, am heilig Obig. Mir hend‘s jetz grad mit de Enkelchind vo minere Partneri erlebt. Heilig Obig het immer bi üs stattgfunde. Jetzt lebed die drü Chind mit ihrne Eltere imme grössere Hus und meh het die letscht Wyhnacht problemlos chöne döt fiere, aber nei. Kind hend druf bestande, d’Wyhnachte wird bim Grossmami gfieret. Und zwor immer glich. Meh chunt im Dunkle ihne, es Glöggli lütet, meh seit de Chind s’Chrischchindli isch etz grad do gsi, het’s Bäumli brocht und Gschenkli und isch grad usem Fenster entschwunde.
Ich weiss no wie da bi mir gsi isch, meh het das Chrischchindli grad no gseh wie’s abgfloge isch. Meh het’s wölle gseh. Das Ritual het eim das ermöglicht.
Mir hend’s jo wohrschindlich alli selber erlebt, wenn die Zyt chunt wo me den nüme as Chrischchindli glaubt, wenn sich das Wyhnachtritual plötzlich veränderet will mir älter werded. Den chunt irgendwenn die Zyt wo d’Wyhnacht sich under Umstände sogar zum Familie chaos entwicklet.
Erst den wemme Johre spöter den Glegeheit het wieder mit Chind zäme d’Wyhnacht z’fiere find mes au wieder schön und freut sich uf das alljöhrlichi Ritual. De Vers us em Matthäus-Evangelium: „Wenn ihr nicht umkehrt und werdet wie die Kinder, werded ihr nicht in das Himmelreich hineinkommen.“
Sotig alljöhrlichi oder täglichi Ritual gäbed üs Sicherheit und Halt.
Ich weiss nöd wie’s ihne ergange isch, jetzt do vorane wo üs Odd Fellows en Iblick geh hend i sones Ritual vo ihrer Bruederschaft. Ganz ehrlich, hend sie dewered nöd au mängmol s’Gfühl ka, das isch etz also öpis, wo ziemlich us de Zyt gheit isch.
Ich persönlich ha chli de Idruck gha, es isch wie e Theaterinszenierig. Aber ich muess säge, Huet ab. Ich find’s Muetig vo dene Manne, öffentlich ane z’toh und öpis z’präsentiere, wo für die meiste vo üs Zueschauer im erste Moment nöd nochvollziebar isch.
Als Schauspieler probier ich mich immer i mini Rolle z‘versetze. Wenn ich jetzt do hüt als aktive Beteiligte a dem Ritual debi wär, den het ich mir die Frog gstellt, was denked echt Gäst.
Drum han ich gseit Huet ab, das isch muetig vo eu. Es isch muetig, we me meh öffentlich bekennt, für was meh i stoht. Das meh bereit isch, sich innerhalb vo de Bruederschaft au immer selber z’reflektiere. Sich pris z’geh, sich ehrlich mitzteile und au bereit isch, sich gegesitig z’understütze. Ich denke, wenn eim e sones Ritual im erste Moment au befremdet, so chan ich mir guet vorstelle, das wemme den emol de Zuegang het, dass es sehr spirituel und befreiend cha si. Befreiend vom Lärm und vo de Hektik vom Altag. Odd Fellows oder Joga?
Meh müesstis halt emol usprobiere, nume zueluge langet nöd. Es macht eim gwunderig.
Was eim uffallt sind die Symbol wo üs währed dem Ritual bereits scho erlüteret worde sind. Ich finde, das die Symbol dem Rum e gwüssi Aura verleihed. S’ganzi muetet im erste Moment viellicht a wie innere Chile. Aber weme dene Symbol meh Beachtig schenkt, chunt meh schnell druf, dass sich‘s nöd explizit um Religiösi Symbol handlet. Für mich hend die Symbol ehnder öpis müstisches. Uf mich würkets meditativ.
Zum Bispiel das allsehende Auge het’s mir atue. Es heisst jo zwor, du sollst dir von Gott kein Bildnis machen. Aber do chame jetzt emol es Aueg zuetruke.
Das Symbol wird jo als Auge Gottes bezeichnet wo alles gseht. Das Zeiche taucht a de verschiedenste Orte uf. Meh findet das jo sogar uf de Amerikanische Dollar Note.
Ich bi aber nöd sicher, öb Gott würklich alles gseht, was döt mit dene Dollar Notene alles gmacht wird. Die Symbol hend jo d’Odd Fellows nöd für sich pachtet, die tauched wie scho erwähnt überall immer wieder uf, i de verschiedenste Kulture.
Ebe wie das allsehende Auge Gottes, uf de Dollar Note. Sogar bim Russische Gheimdienst. Es stoht in Frankrich sit 1789 über de Mensche und Bürgerrechtserklärig. Das Symbol taucht au uf verschiedenste Wappe und Flagge uf.
Die Symbol lönd sich sicher underschiedlich düte und werded underschiedlich interpretiert, aber im Sinn und Zweck stönd sie für Wert, Lebesweisheite und Lehre. Sie sind eso öpis wie en Wegwieser für die, wo uf de Suechi noch em Sinn sind.
Nebedbi, Konfessions Zueghörigkeit spielt bi de Bruederschaft vo de Odd Felows kei Rolle.
Im Mittelpunkt stoht de Mensch.
Das Symbol mit dere Chete, die drü Cheteglieder wo für Fründschaft, Liebi und Wohret stöhnd. Das Symbol stoht au für d‘Menschecheti rund um de Globus. Stoht das Symbol also au für die sogenannti moderni Globalisierig?
Es isch jo vor allem die Globalisierig wo die neue Bedürfniss und Wert diktiert, alles immer schneller, vo allem immer Meh, alles immer billiger und glichzytig aber au no rentabler.
Ich froge mich scho lang wie das cha ufgoh.
Wer do alles uf de Strecki blibt, wer do täglich usbütet wird, wo liet do no Gerechtigkeit. Mit de Natur isch me scho lang nüme Achtsam, aber die wehrt sich jetzt. Natur schlot zrugg. Natur cha sich das leiste. Natur brucht üs nöd. Aber mir bruched d’Natur.
Und wie seit meh doch „Zurück zur Natur“. Also viellicht au „Zurück zu den Werten.“
Es liet a jedem einzelne vo üs a dene Wert z’schaffe.
Wieso nöd mit regelmässiger Meditation und Achtsamskeitsüebige wo eim Chraft gäbed im Hier und Jetzt z’lebe und bewusster mit sich selber und anderne umzgoh.
Erst wemme sich selber cha usstoh sich selber liebe und Mitgfühl für anderi cha zeige, cha me sicher au dezuz biträge meh Liebi i de Welt z’verbreite. Chlini Geste vo Fründlichkeit und Nöchsteliebi chön en grosse Underschied us mache.
Fründschafte pflege, Zyt und Energie i Beziehige mit Fründe und Aghörige investiere, ihne zuelose und sie in guete und schlechte Zyte understütze.
Ehrlich mit sich selber und de andere si. Lüge und Tüschige vermiede, au wenn’s mengmol eifacher wär, als d’Wohret säge. Offeheit und Transparenz sind wichtigi Grundlage für e gsundi Beziehig.
Meh muess die Wert wieder aktiver lebe und fördere, nur so wird de Mensche Bedütig vo Wert wieder bewusster.
D’Odd Fellows glaubed a Bedütig vo Gmeinschaft und Zämmehalt, sie setzed sich aktiv für soziali Grechtigkeit i und sind bestrebt Bedürftige z’helfe. Durch die Ritual und Zeremonie stärked sie Bindig under de Mitglieder und fördered s’Gfühl vo Verbundeheit und Solidarität.
D’Odd Fellows sind, das isch mini Meinig, einzigartig und bütet dene Mensche Rum wo de Glaube a Menschheit nonig verlore hend.
Und wenn ich am Afang gseit ha, die Ritual seged us de Zyt gfalle, muess ich viel ehnder säge, d’Odd Fellows sind Zytlos.
Zum eine will sie Zyt scho lang überduret und zum andere will’s immer no Mensche git wo uf de Suechi noch em Sinn vom Lebe sind.
Drum also der Weg ist das Ziel. Und wenn sich mit de Odd Fellows e sonen Chance a‘bütet, uf dere Suechi noch em Sinn, denn muess meh sich de Weg als Option offe halte.
Es isch also kei Hokuspokus, sondern ganz eifach es Johrhundert alts Bedürfnis vom Mensch, s’Bedürfnis noch Wiederholig, noch Geborgeheit und im Iklang mit sich selber si.
Ich danke für ihri Ufmerksamkeit. De Coiffeurmaeister git zeugg an Obermeister.
